ကေအိုင်အေ…
တို့တစ်တွေဟာ တစ်မြေတည်းနေ တစ်ရေတည်းသောက်ပြီင်္း တစ်မိုးအောက်မှာ အသက်ရှူခွင့်ရကြတဲ့ တိုင်းရင်းသား ညီအကိုတွေပါ …။ မင်းတို့ဆီက အစပြုတဲ့ မြစ်မင်းဧရာဆိုတာ ငါတို့မြန်မာနိုင်ငံရဲ့ အသက်သွေး ကြောတစ်ခုအဖြစ် ဂုဏ်ယူကြသလို ကချင်လူမျိုး ၊ ကချင်တိုင်းရင်းသား ဆိုတာကလဲ ငါတို့နှလုံးသားတွေထဲက ထာဝရ ညီအကိုတွေပါ..။
ငါတို့ဆိုတာက…
တိုင်းရင်းသား ညီအကိုတွေ စုပေါင်းနေထိုင်တဲ့ အမိမြေကို ကာကွယ်ဖို့၊ ငါတို့သင်နေတဲ့ စစ်ပညာနဲ့ ငါတို့ကိုင်တွယ်နေရတဲ့ လက်နက်ဆိုတာတွေက ငါတို့တိုင်းပြည်ကြီးကို ကျူးကျော်လာတဲ့ တိုင်းတစ်ပါး သားတွေကို သုတ်သင်ဖို့ ၊မင်းတို့တစ်တွေက တိုင်းတစ်ပါးသားတွေ မဟုတ်ကြသလို ငါတို့ရဲ့ ရန်သူတွေလို့လဲ မသတ်မှတ်ခဲ့ပါဘူး …အခြေအနေအမျိုးမျိုးကြောင့် အခုလို ညီအကိုတွေ စိတ်သဘောထားကွဲပြီး ခဏမသင့်မြတ်တဲ့ အချိန်မှာ မလွှဲသာလို့ ကျည်ဆံတစ်တောင့်ထွက်သွားဖို့အရေး မောင်းခလုတ်ကို ဆွဲရတဲ့အခါတိုင်း အသွေးထဲအသားထဲက နာကြဉ်ရတယ်…။ ယုံကြည်မှုတစ်ခုအတွက် တိုက်ပွဲဝင်ရင်း သေဆုံးသွားတဲ့ မင်းတို့ခန္ဓာတွေရဲ့ဘေးမှာ ဒီနဖူးလေးက မင်းသားလေးနမ်းတဲ့ နဖူးလေးများလား ၊ဒီနဖူးလေးက မင်းကြင်သူ သက်ထားနမ်းတဲ့ နဖူးလေးများလားဆိုပြီး စိတ်မကောင်းဖြစ်ရတာ အမှန်ပဲ..။ဒီလိုပဲ တစ်ချိန်က ငါတို့မြေပေါ်က နယ်ချဲ့တွေကို အသက်နဲ့ရင်းပြီး လွတ်လပ်ရေးကို သူတို့ရဲ့သွေးတွေနဲ့ရယူပေးခဲ့တဲ့ ငါတို့ညီအကိုတွေရဲ့ ဘိုးဘွားတွေသာ သိခဲ့ရင် ရောက်လေရာ ဘ၀က သူတို့စိတ်မကောင်းဖြစ်မှာ အသေအချာပဲလေ…။
နွားကွဲရင် ကျားဆွဲတယ်လို့ ဆိုရိုးစကားအတိုင်း အခုလို ငါတို့ညီအစ်ကိုတွေ ၀ါးစည်း ပြေသလိုဖြစ်နေရတာကို အရှေ့မြောက်အရပ်က မျက်လုံးမှေးမှေးလူကြီးတွေက လက်ခုတ်တွေတီးပြီး ၀မ်းသာနေကြသလို အနောက်အရပ်က အမွှေးထူထူနဲ့ လူတွေက မျက်စိတစ်ဆုံးနဲ့အရိပ်တစ်ကြည့်ကြည့် ကြည့်နေကြမှာ…။ ဒီအတိုင်းဆို ငါတို့နိုင်ငံရဲ့ အနာဂတ်နှင့် နောက်မျိုးဆက်တွေအတွက် တွေးကြည့်ရင် တကယ်ကိုရင်လေးစရာကြီးပါပဲ…။
ဒါကြောင့်မို့
အတ္တတွေနဲ့ စီးချင်းထိုးနေတဲ့ လက်နက်တွေကို အမြန်ဆုံးလွှတ်ချပြီး တိုင်းပြည်ရဲ့ မှောင်နေတဲ့ အနာဂတ်တွေအတွက် အလင်းပြဖို့ ငါတို့ပခုံးပေါ်က သမိုင်းပေးတာဝန်တွေကို ကျေပွန်အောင် ထမ်းရွက်ကြပါစို့လား
တနေ့မှာတော့…
ငါတို့နိုင်ငံကြီးဟာ ဟိုးအမြင့်ဆုံးမှာ လမင်းကြီးလို ထည်ဝါနိုင်ဖို့ ငါတို့ညီအစ်ကိုတွေ ကြယ်တွေလေးလို အစွမ်းကုန် အလင်းပေးပြီး ချိုးဖြူငှက်ငယ်လေးတွေပျံသန်း လာမယ့်လမ်းမှာ ငါတို့ဘတ်ရင်ထဲကဘယ်တော့မှ မပုတ်သိုးနိုင်တဲ့ ထာဝရငြိမ်းချမ်းရေးတွေနဲ့အတူ လက်တွဲကာကြိုဆိုလိုက်ကြရ အောင်လားနော်...။
(လွမ်းဝေ)
0 comments:
Post a Comment